பெருமாள்முருகன் எழுதிய 'மாதொருபாகன்' நாவல் 2010ஆம் ஆண்டு டிசம்பர் மாதம் வெளியானது. 2013இல் அதன் ஆங்கில மொழிபெயர்ப்பு (One Part Woman) வந்தது. தமிழிலும் ஆங்கிலத்திலும் மிகுந்த வாசகக் கவனம் பெற்ற இந்த நாவலுக்கு 2014ஆம் ஆண்டு இறுதியில் பெரும் எதிர்ப்பு உருவாயிற்று. நாவலைத் தடைசெய்யுமாறு கோரியும் நூலை எரித்தும் சாதி மத அடிப்படைவாதிகள் திட்டமிட்டுக் கலவரம் செய்தனர்.

அப்பிரச்சினையின் காரணமாக ‘எழுத்தாளன் பெருமாள்முருகன் செத்துவிட்டான்’ என அறிக்கை வெளியிட்ட பெருமாள்முருகன் பொதுவெளியில் இருந்து ஒதுங்கிக் கொண்டார்.

கருத்துச் சுதந்திரத்தை ஆதரித்து எழுத்தாளர்கள், ஊடகவியலாளர்கள், பதிப்பாளர்கள், சமூகச் செயற்பாட்டாளர்கள், இடதுசாரிகள் உள்ளிட்டோர் போராட்டம், அறிக்கைகள், கட்டுரைகள், பதிவுகள் எனப் பலவகையில் மாதொருபாகன் நாவலுக்கு ஆதரவாக நின்றனர்.

தமிழ்நாடு முற்போக்கு எழுத்தாளர்கள் கலைஞர்கள் சங்கம் தொடுத்த வழக்கில் சென்னை உயர்நீதிமன்றம் கருத்துரிமைக்கு ஆதரவாக 2016, ஜூலை 5 அன்று தீர்ப்பு வழங்கியது.

இப்பின்னணி கொண்ட 'மாதொருபாகன்' நாவல் தொடர்பான அனைத்தையும் ஒருசேரத் தொகுத்து வழங்க முயலும் பொதுத்தளம் இது.